Kina pretendon se është e pamundur që virusi që shkaktoi pandeminë Covid-19 të ketë dalë nga një laborator kinez.
“Përfundimi shkencor (…), i arritur nga ekipi i përbashkët i ekspertëve nga Kina dhe Organizata Botërore e Shëndetësisë (OBSH) bazuar në vizitat në terren në laboratorët përkatës në Wuhan, është se konsiderohet jashtëzakonisht e pamundur që të ketë pasur një rrjedhje”, tha zëdhënësja e ministrisë së Jashtme kinezë, Mao Ning.
“Kjo u njoh gjerësisht nga komuniteti ndërkombëtar dhe shkencor,” theksoi Mao.
Disa ditë më parë, CIA njoftoi se ka arritur në përfundimin se ka shumë gjasa që pandemia e Covid-19 të ketë origjinën në një laborator dhe jo në natyrë. Por agjencia e inteligjencës paralajmëroi se kishte “besim të ulët” në këtë përcaktim.
Raporti u publikua të shtunën pas zgjedhjes së kreut të ri të agjencisë John Ratcliffe, i cili u propozua për këtë post nga presidenti Donald Trump. Drejtori i ri tha se një nga prioritetet e tij të para ishte që agjencia të bënte një vlerësim publik mbi origjinën e pandemisë. Vet kreu i ri i CIA ka deklaruar disa herë se me të dhënat që kishte, ishte i mendimit se origjina e virusit ishte një laborator në Kinë dhe jo një proces natyror.