Agjencia Qendrore e Inteligjencës Amerikane (CIA) ka vlerësuar se Ukraina nuk ka kryer një sulm me dron ndaj një rezidence të përdorur nga presidenti rus Vladimir Putin, duke hedhur poshtë publikisht pretendimet e bëra nga vetë Putini, raporton CNN.
Sipas multimedialit, drejtori i CIA-s, John Ratcliffe, e informoi presidentin amerikan Donald Trump më 31 dhjetor se agjencia nuk beson se një sulm i tillë ka ndodhur.
Kjo bie drejtpërdrejt në kundërshtim me deklaratat e Putinit, i cili gjatë një bisede telefonike me Trump kishte pohuar se Ukraina kishte tentuar të godiste rezidencën e tij në veri të Rusisë.
Rusia e akuzoi publikisht Ukrainën për këtë sulm të supozuar, ndërsa Trump fillimisht shprehu shqetësim, duke deklaruar: “Nuk më pëlqen. Nuk është gjë e mirë”, megjithëse pranoi se ishte “e mundur” që pretendimi të mos ishte i vërtetë.
Megjithatë, pas informimit nga CIA, qëndrimi i Trump duket se u bë më skeptik. Ai ndau në platformën Truth Social një editorial të New York Post me titullin: “Fryrja e ‘sulmit’ ndaj Putinit tregon se Rusia është ajo që po pengon paqen”.
Editoriali vë në dyshim vetë ekzistencën e sulmit, duke theksuar se presidenti ukrainas Volodymyr Zelensky e ka mohuar kategorikisht një veprim të tillë dhe se Kremlini nuk ka ofruar asnjë provë konkrete.
Zëdhënësi i Kremlinit, Dmitry Peskov, u kishte kërkuar mediave që “ta marrin fjalën e Kremlinit si të vërtetë”.
Sipas CNN, ky episod ndodh në një moment delikat, teksa Trump dhe ekipi i tij po zhvillojnë përpjekje diplomatike për t’i dhënë fund luftës në Ukrainë.
Pretendimi i Putinit erdhi vetëm një ditë pas takimit të Trump me presidentin Zelensky në Mar-a-Lago, ku të dy shprehën optimizëm për përparim drejt negociatave të paqes.
Disa zyrtarë evropianë e kanë interpretuar akuzën ruse si një përpjekje për të sabotuar procesin e paqes. Përfaqësuesja e lartë e Bashkimit Evropian për politikën e jashtme, Kaja Kallas, e cilësoi këtë pretendim si një “shpërqendrim të qëllimshëm”.