kandidati për kryetar të Çairit, Bujar Osmani, ka reaguar pas lajmit tronditës për sulmin e armatosur ndaj Dr. Zekirija Shahinit, mjek specialist i pulmologjisë dhe kandidat në zgjedhjet e ardhshme nga radhët e Aleancës për Shqiptarët.
Në reagimin e tij publik, Osmani shprehu tronditje të thellë dhe theksoi se, fatmirësisht, jeta e doktor Shahinit është jashtë rrezikut të menjëhershëm, ndërsa ai po merr trajtimin e duhur mjekësor.
“Në momente si ky, duhet të ngrihemi mbi politikën. Dhuna, pavarësisht motivit, është sulm ndaj dinjitetit njerëzor dhe ndaj të drejtës së çdo qytetari për të jetuar e për të marrë pjesë lirisht në jetën demokratike,” – deklaroi Osmani.
Ai i bëri thirrje institucioneve kompetente që të reagojnë me shpejtësi, transparencë dhe vendosmëri, për të zbardhur të vërtetën dhe për të siguruar drejtësi për këtë rast.
Në shenjë solidariteti me Dr. Shahinin dhe për të respektuar seriozitetin e ngjarjes, Osmani njoftoi se aktivitetet publike të Aleancës për Shqiptarët në Çair janë shtyrë.