Kandidati për kryetar të Komunës së Çairit, Bujar Osmani, ka prezantuar pesë zotime kryesore që synojnë përmirësimin e shërbimeve shëndetësore për qytetarët.
Në planin e tij, Osmani thekson rëndësinë e qasjes humane dhe preventive ndaj shëndetit publik, duke vënë theksin te kujdesi për të moshuarit dhe gratë.
Sipas tij, në çdo lagje do të vendoset spital mobil për kontrolle parandaluese falas për të gjithë qytetarët, ndërsa ekipe shëndetësore mobile do të kujdesen për të moshuarit në shtëpi.
Po ashtu, ai ka paralajmëruar programe të veçanta për gratë, që do të përfshijnë zbulimin e hershëm të kancerit të gjirit dhe mbështetje për shëndetin mendor.
“Çairi do të bëhet komuna e parandalimit dhe kujdesit, ku shëndeti vjen para sëmundjes. Si mjek dhe qytetar i Çairit, dua që secili banor të ketë qasje të lehtë dhe të dinjitetshme ndaj shërbimeve shëndetësore,” theksoi Osmani.
Ai përmbylli prezantimin me mesazhin se Çairi do të ketë një kryetar-komune mjek për 80.000 banorë, i cili do të jetë pranë njerëzve me profesionalizëm dhe përkushtim.