Izraeli beson se Irani mund të rikthejë uraniumin e pasuruar të “groposur” në njërin prej objekteve të goditura nga forcat amerikane në qershor. Shqetësimi u ngrit nga një zyrtar izraelit, raporton BBC.
Duke folur për gazetarët amerikanë, zyrtari tha kryerja e pasurimit të uraniumit në Isfahan do të ishte jashtëzakonisht e vështirë dhe çdo përpjekje do të sillte sulme të reja izraelite. Donald Trump ka pohuar vazhdimisht se sulmet ajrore dhe raketore të SHBA-së mbi Iranin në qershor shkatërruan objektet bërthamore të vendit, edhe pse disa agjenci të inteligjencës amerikane kanë mbajtur një qëndrim të kujdesshëm për këtë pjesë.
Nga ana tjetër, Irani mohon se synon të zhvillojë armë bërthamore dhe thotë se pasurimi i uraniumit është për qëllime paqësore.
Por, në një konferencë për gazetarët në Uashington, zyrtari i i lartë izraelit – i cili nuk pranoi të identifikohej, tha se inteligjenca tregon se një pjesë e madhe e uraniumit të pasuruar të Iranit është “varrosur” në Isfahan i cili u bombardua me raketa të lëshuara nga nëndetëset, gjatë operacionit “Midnight Hammer” në 22 qershor. Megjithatë, izraeliti tha se ccdo përpjekje e Teheranit për të rikuperuar materialin ndoshta do të zbulohej. Sipas zyrtarit, vlerësimi i Tel Avivit është se programi bërthamor i Iranit është vonuar me 2 vjet.
Trump dhe anëtarët e administratës së tij kanë qenë të bindur se objektet bërthamore iraniane u shkatërruan plotësisht. “Siç e ka thënë shumë herë Presidenti Trump, Operacioni “Midnight Hammer” i shkatërroi plotësisht objektet bërthamore të Iranit”, tha zëdhënësja e Shtëpisë së Bardhë, Anna Kelly, në një deklaratë dërguar mediave amerikane. “E gjithë bota është më e sigurt falë lidershipit të tij vendimtar”, vijoi ajo.
Vlerësimet e inteligjencës amerikane kanë qenë më të kujdesshme. Një raport paraprak që doli nga Agjencia e Inteligjencës së Mbrojtjes arrin në përfundimin se, “ndërsa të tre vendet – Fordo, Natanz dhe Isfahan – u dëmtuan rëndë, ato nuk u shkatërruan plotësisht”.
Në fund të qershorit, drejtori i CIA-s, John Ratcliffe, u tha ligjvënësve amerikanë se shkatërrimi i objektit të vetëm të Iranit për prodhimin e uraniumit metalik, ia hoqi në mënyrë efektive aftësinë Teheranit për të ndërtuar një armë bërthamore.
Në një intervistë për Tucker Carlson të publikuar këtë javë, presidenti iranian Mahmoud Pezeshkian tha se objektet ishin “dëmtuar rëndë”.
“Prandaj ne nuk kemi asnjë akses në to”, tha ai, duke shtuar se një vlerësim i plotë për shkallën e dëmtimit është i pamundur për momentin.