Kandidati për kryetar të Komunës së Sarajit nga Aleanca për Komb dhe Integrim (AKI), Blerant Ramadini, ka zhvilluar një takim madhështor me Forumin e Gruas të AKI-së, në kuadër të aktiviteteve për shënimin e Tetorit Rozë – muajit të ndërgjegjësimit për shëndetin e gruas dhe luftën kundër kancerit të gjirit.
Në një atmosferë të mbushur me shpresë, dinjitet dhe forcë, Ramadini theksoi rolin e gruas si shtyllë e familjes dhe e shoqërisë, duke vlerësuar kontributin e tyre të pazëvendësueshëm.
“Në çdo grua të Sarajit ne shohim frymën e Mbretëreshës Teuta, që me mençuri dhe guxim udhëhoqi popullin e saj, dhe zemrën e Nënë Terezës, që me dashuri dhe përkushtim i shërbeu njerëzimit,” – tha Ramadini.
Ai shtoi se këto dy figura përfaqësojnë vendosmërinë dhe mëshirën, dy shtylla që e bëjnë gruan shqiptare të pathyeshme në familje, në shoqëri dhe në jetën publike.
Ramadini theksoi se Tetori Rozë nuk është vetëm muaj simbolik, por një thirrje për kujdes, dashuri ndaj vetes dhe solidaritet ndaj njëra-tjetrës, duke nënvizuar se shoqëria që fuqizon gratë është ajo që ecën drejt zhvillimit dhe drejtësisë.
Në fund, kandidati i AKI-së për Saraj theksoi se 19 Tetori është më shumë se një datë zgjedhjesh:
“Është dita e besimit, e bashkimit dhe e fitores. Sepse pa zërin, forcën dhe urtësinë e grave, nuk ka fitore të plotë. Gratë e Sarajit janë zemra e ndryshimit. Bashkë për fitoren e 19 Tetorit!”
