Bashkimi Evropian ka transferuar 1 miliard euro shtesë në Ukrainë në kuadër të nismës së G7-ës për Përshpejtimin e të Ardhurave të Jashtëzakonshme (ERA), me fondet e ardhura nga fitimet e krijuara nga asetet sovrane të ngrira ruse, tha kryeministri ukrainas Denys Shmyhal.
“Ky është kësti i tretë sipas nismës së G7, i siguruar nëpërmjet të ardhurave nga asetet e ngrira ruse. Fondet do të ndahen për nevojat tona kryesore buxhetore,” tha Shmyhal.
Lexo edhe:
Tragjedia në Republikën Domenikane, shkon në 184 numri i të vdekurve nga shembja e çatisë në klubin e natës
Sipas kryeministrit ukrainas, shteti i tij tani ka marrë gjithsej 5 miliardë euro përmes mekanizmit ERA nga partnerët evropianë.
Shmyhal tha se njoftimi për këstin është bërë gjatë takimit të tij me komisionerin e BE-së për Ekonomi dhe Produktivitet Valdis Dombrovskis në Bruksel.
“Unë theksova në takim se përparësia jonë është konfiskimi i plotë i aseteve sovrane të ngrira ruse, të cilat duhet të përdoren si një burim për rindërtimin e Ukrainës. Ne i kushtuam vëmendje të veçantë kësaj çështjeje,” vuri në dukje Shmyhal.