Bashkimi Demokratik për Integrim ka reaguar ashpër ndaj paraqitjes së përbashkët të kryeministrit Hristijan Mickoski dhe kryetarit të Komunës së Tetovës, Bilall Kasami, gjatë inspektimit të punimeve në shkollën fillore “Kiril Pejçinoviq” në Tetovë – vetëm një ditë pas takimit të Mickoskit me kryeministrin e Serbisë. Sipas BDI-së, pas kamerave po fshihen marrëveshje të errëta dhe bashkëpunime që rrezikojnë interesin kombëtar shqiptar.
Në reagimin zyrtar të BDI-së thuhet se ky episod e bën gjithnjë e më të qartë natyrën e koalicionit VLEN, të cilin e cilësojnë si “dega e VMRO-DPMNE-së te shqiptarët”.
“Kryeministri nuk ka nevojë të kandidojë njerëzit e tij në Tetovë, Çair, Gostivar apo Strugë, sepse kandidatët e VLEN-it janë në fakt kandidatët e tij politikë,” theksohet në reagim.
Sipas BDI-së, mbështetja publike e Mickoskit për Kasamin nuk është e rastësishme, por pjesë e një marrëveshjeje të heshtur politike që përfshin edhe financime të dyshimta.
“Askush më mirë se Bilall Kasami nuk do ta pranonte një ‘donacion serb’ për ndërtimin e kishës në Tetovë dhe për rikonstruksionin e shkollës ‘Kiril Pejçinoviq’,” thuhet më tej në deklaratë.
BDI paralajmëron se qytetarët duhet të dinë qëllimin e vërtetë të këtij donacioni dhe natyrën e lidhjeve që qëndrojnë pas tij.
“Transparenca është zero, ndërsa dyshimet për ndikime të jashtme janë të thella. Në vend që t’u shërbejë qytetarëve, kryetari i Tetovës u shërben planeve të Mickoskit dhe politikave të ‘Botës Serbe’,” thuhet në reagimin e kësaj partie.
Kërkesë për llogaridhënie
Në fund të deklaratës, BDI kërkon sqarime urgjente për marrëveshjen, burimin e fondeve dhe përfituesit realë të projektit.
“Qytetarët e Tetovës meritojnë llogaridhënie, jo propagandë,” përfundon reagimi i BDI-së.
Ky zhvillim, sipas BDI-së, ndodh në kulmin e fushatës zgjedhore, kur raportet ndërmjet VLEN-it dhe VMRO-DPMNE-së janë bërë një nga temat më të diskutuara në arenën politike shqiptare në Maqedoninë e Veriut.