Qeveria vazhdon me krijimin e “zonave pa shqiptarë” në institucionet shtetërore, duke i larguar në mënyrë sistematike shqiptarët nga pozicionet vendimmarrëse. Këtë herë, kjo qasje reflektohet në përbërjen e ekipit këshillues të Kryeministrit, ku pothuajse nuk ka asnjë shqiptar. Kështu thuhet në reagimin e BDI-së pas publikimit të 17 emrave të këshilltarëve të kryeministrit Hristijan Mickoski.
“Kjo politikë e majorizimit nuk është e re dhe përfaqëson një ristrukturim të njëanshëm të sistemit shtetëror, duke promovuar dominimin monoetnik. Kjo qasje tregon qartë se mekanizmat e balansuesit etnik janë ende të domosdoshëm për të ruajtur karakterin multietnik të shtetit – një nga arritjet më të rëndësishme që tani është seriozisht e rrezikuar, thuhet në reagimin e BDI-së.
Ndërtimi i institucioneve funksionale dhe gjithëpërfshirëse, vijon më tej reagimi, është thelbësor për barazinë etnike, por edhe për vlerat evropiane mbi të cilat duhet të bazohet stabiliteti dhe progresi afatgjatë i vendit.
“Me këtë veprim,Qeveria jo vetëm që ka degraduar partnerin shqiptar në qeveri, por ka krijuar ndjenjën e përjashtimit dhe të papranueshmërisë për çdo shqiptar në këtë shtet.
Ndryshe, kryeministri Hristijan Mickoski ka 17 këshilltarë të jashtëm, emrat e të cilëve janë bërë të ditur publikisht – asnjë shqiptarë. Mes tyre janë edhe ish zëvendëskryeministri për Çështje ekonomike, Vlladimir Peshevski, ish ministri i Financave, Zoran Stavreski dhe ish kryetari i Kuvendit, Trajko Veljanovski.
Profesori Aleksandar Spasenovski është këshilltar për çështje evropiane, ndërsa për politikë të jashtme, kryeministrin do ta këshillojë ambasadori Sasho Markovski.
Mes 17 këshilltarëve të kryeministrit është edhe një gjerman. Johanes Hajdeker është ekspert në forcimin e kapaciteteve të ekipit ekonomik në Zyrën e kryetarit të qeverisë për përgatitjen e dokumenteve për politika, analiza.
Në fushën e sigurisë, Goran Nikollovski është këshilltar për çështje strategjike të sigurisë, ndërsa Lubço Andonovski këshilltar për siguri kombëtare. Jovan Pejkovski është këshilltar në sferën e shkencave politike dhe ekonomike.
Për këshilltar për infrastrukturë është emëruar Cvetko Micevski, në fushën e drejtësisë Goce Naumovski, ndërsa për punë dhe politikë sociale Lazar Jovevski. Këshilltar i kryeministrit për mjedisin jetësor është Dame Dimitrovski, ndërsa për marrëdhënie mes bashkësive Shener Bilall. (Koha.mk)