Ish-pjesëtari i Policisë së Kosovës nga Kamenica, Nexhat Pireva, është arrestuar sot në orët e para të mëngjesit nga autoritetet serbe në pikën kufitare të Dheut të Bardhë, ndërsa pas rreth katër orësh marrje në pyetje është liruar.
Sipas njoftimit të Ministrisë së Punëve të Jashtme dhe Diasporës, Pireva, i cili ka shërbyer rreth 14 vjet në Policinë e Kosovës dhe po udhëtonte drejt Bujanocit me bashkëshorten dhe fëmijët është ndaluar pa asnjë bazë të qartë, duke iu nënshtruar procedurave të gjata para se të lirohej.
“MPJD dënon veprimet e vazhdueshme të autoriteteve serbe, të cilat përbëjnë keqtrajtim të shtetasve të Republikës së Kosovës dhe janë në kundërshtim me marrëveshjet e nënshkruara mes dy shteteve”, thuhet në reagim.
Ministria u ka bërë thirrje qytetarëve të Kosovës që të shmangin udhëtimin përmes territorit të Serbisë “deri në informacione të mëtejshme”, për të garantuar sigurinë e tyre.
Rastet e ndalimeve të tilla nga autoritetet serbe janë shtuar vitet e fundit, shpesh ndaj qytetarëve që Serbia i akuzon për krime lufte.