Në vend që tragjedia e rëndë në Koçan të shërbente për reflektim dhe drejtësi, ajo po keqpërdoret në mënyrën më të ulët – për të ushtruar represion të pastër politik dhe etnik ndaj shqiptarëve. Paralajmërimi i kryeministrit Hristijan Mickoski, se do t’i “kapim për veshi”, tashmë është kthyer në realitet përmes arrestimeve të pabazuara dhe të njëanshme që po kryhen nga Prokuroria dhe Ministria e Punëve të Brendshme.
Ky nuk është më vetëm një rast i drejtësisë selektive – është një fushatë e mirëorganizuar që synon dy gjëra: të mbulojë fajtorët e vërtetë dhe të frikësojë shqiptarët. Në vend që institucionet të kërkojnë përgjegjësi te ata që kishin kompetenca për parandalimin e tragjedisë – përfshirë kryeministrin, ministrin e MPB-së dhe autoritetet lokale – ato kanë zgjedhur rrugën më të rrezikshme: ndëshkimin etnik.
Aleanca për Shqiptarët ngre zërin kundër këtij abuzimi me dhimbjen e viktimave dhe kërkon hetim të plotë, transparent dhe të paanshëm. Keqpërdorimi i një tragjedie për të forcuar një axhendë politike dhe për të shtypur një komunitet të tërë është jo vetëm i turpshëm, por dhe i rrezikshëm për paqen dhe bashkëjetesën.
Nëse drejtësia kthehet në vegël për ndëshkimin e shqiptarëve, atëherë edhe viktimat nuk do të gjejnë kurrë drejtësi. Shqiptarët nuk janë as fajtorë kolektivë, as objekt manipulimi politik. Ata janë qytetarë të këtij vendi, dhe kjo fushatë e rrezikshme duhet të ndalet tani