Aleanca për Shqiptarët ka reaguar ashpër pas publikimit të projekt-rezolutës së Parlamentit Evropian, në të cilën theksohet ndikimi i rrezikshëm i të ashtuquajturës “Botë serbe” në Maqedoninë e Veriut dhe në rajon.
“Ajo që e kemi thënë prej kohësh, madje që para zgjedhjeve të 8 majit, sot po konfirmohet nga vetë institucionet evropiane. Këshilli i Evropës dhe raporti i progresit për Maqedoninë e Veriut tregojnë qartë: ‘Bota serbe’ po minon sovranitetin e vendit dhe përfaqësuesit qeveritarë në Shkup jo vetëm që nuk e ndalojnë këtë ndikim, por e përkrahin dhe e promovojnë atë,” thuhet në reagimin e Aleancës.
Raporti i progresit, i hartuar nga eurodeputeti Thomas Weitz, do të jetë objekt debati në seancën e 8 korrikut në Strasburg. Ndërkohë, Aleanca për Shqiptarët kujton se shenjat për këtë rreshtim pro-serb ishin të dukshme që në ditët e para të formimit të Qeverisë:
Përjashtimi i shqiptarëve nga qeverisja aktive;
Emërimi i Stoilkoviqit si figurë e dytë më e fuqishme në Qeveri;
Tentativa për të ndalur projektin strategjik të Korridorit 8;
Zhbërja graduale e Marrëveshjes së Ohrit;
Investimi prej 2 miliardë eurosh në hekurudhën e shpejtë të Korridorit 10, që favorizon interesat serbe dhe nuk sjell përfitime konkrete për qytetarët e Maqedonisë së Veriut, por ngarkon buxhetin e tyre.
“Pyesim publikisht partitë e koalicionit VLEN: A e kuptojnë tani se kujt i shërbejnë me qëndrimin e tyre në këtë qeveri pro-serbo-ruse?” përfundon reagimi i Aleancës për Shqiptarët.