Danella Arsovska me mesazh kritik për Ambasadën e SHBA-së në Shkup: Pse personat nën hetim për krim janë në mesin e VIP-ëve?
Në një status të publikuar më 4 Korrik, në Ditën e Pavarësisë së Shteteve të Bashkuara të Amerikës, kryetarja e Shkupit, Danella Arsovska, ka uruar ambasadoren amerikane Angela Ageler, por njëkohësisht ka ngritur pyetje të drejtpërdrejta lidhur me përzgjedhjen e të ftuarve në ceremoninë e organizuar në Ambasadë.
“Vetëm po pyes, nuk ju duk pak e papërshtatshme që në listën e VIP-ëve dje ishin persona që në fakt duhet të jenë në listën e zezë të sanksioneve?” – shkroi Arsovska, duke iu referuar dy personave konkretë të pranishëm në aktivitet.
Ajo theksoi se ndaj këtyre dy individëve ekzistojnë “dëshmi të pakontestueshme për krim në të paktën 152 raste” dhe se për ta aktualisht po zhvillohen hetime serioze. Arsovska nënvizoi se, ndërsa në listat e sanksioneve amerikane gjenden persona që janë aty vetëm mbi baza dyshimesh, këta dy persona ndaj të cilëve, sipas saj, ka prova të forta, ishin të ftuar të nderuar në radhën e parë të eventit.
“Me dekada në listën e sanksioneve janë vendosur persona për shkak të dyshimeve për korrupsion dhe minimin e proceseve demokratike – ish-kryeministra, ministra, kryetarë komunash, gjyqtarë – si pjesë e përpjekjeve të SHBA-së për të promovuar përgjegjësinë dhe luftën kundër korrupsionit në Ballkanin Perëndimor. Por për këta dy persona ka dëshmi të pakundërshtueshme, jo thjesht dyshime,” – theksoi Arsovska.
Në fund të postimit të saj, ajo përshëndeti përsëri festën amerikane:
“🇺🇸 Uroj Ditën e Pavarësisë, me shpresë për Liri dhe Drejtësi për të gjithë ne që jetojmë në Maqedoni dhe që jemi nën kërcënime serioze nga Visar Ganiu, Izet Medziti dhe Ejup Ademi!” – shkroi Arsovska, duke përmendur me emra persona që sipas saj përbëjnë rrezik për shoqërinë.