Kandidati për Komunën e Strugës, Arsim Dalipi, ka ndarë emocionet dhe mesazhet nga një takim i veçantë me gratë e Forumit në Strugë, duke vlerësuar rolin e jashtëzakonshëm që ato luajnë çdo ditë në shoqëri.
“Kisha kënaqësinë të jem mes grave të Forumit – gra të forta, të përkushtuara dhe me zemër të madhe, që çdo ditë mbajnë mbi supe familjen, punën dhe shpirtin e këtij qyteti”, shkroi Dalipi në një postim në rrjetet sociale.
Ai theksoi se në sytë e këtyre grave shfaqet forca e vërtetë e Strugës – një forcë që sjell ndryshim me dashuri, durim dhe përkushtim. Gjatë takimit, u diskutua për tema kyçe si roli i gruas në shoqëri, barazia gjinore, vendimmarrja, dhe nevoja që Komuna e Strugës të qëndrojë pranë çdo gruaje – përmes mbështetjes konkrete, respektit dhe politikave që lehtësojnë jetën e përditshme.
Në cilësinë e mjekut, Dalipi ndau edhe një mesazh për rëndësinë e kujdesit ndaj shëndetit të grave, sidomos gjatë muajit të ndërgjegjësimit për kancerin e gjirit, duke theksuar se kontrolli i hershëm shpëton jetë dhe kërkon përkushtim të përbashkët nga të gjithë.
“Struga që unë besoj është një Strugë që kujdeset për të gjithë – për nënat, motrat, vajzat dhe çdo qytetar që kontribuon me ndershmëri për një të ardhme më të mirë”, u shpreh Dalipi.
Ky takim konsiderohet si një tjetër hap në drejtim të afrimit të politikës me qytetarin dhe fuqizimit të zërit të gruas në jetën publike dhe vendimmarrje.