Shkruan: Arben Ratkoceri
Dëmi më i madh që Arben Taravari i ka shkaktuar shqiptarëve të Maqedonisë së Veriut nuk është vetëm politik, por shoqëror në përmasa afatgjata. Me veprimet e tij, ai përçau strukturën e vetme opozitare serioze që ka ekzistuar ndër shqiptarë – Aleancën për Shqiptarët.
Kjo parti ka qenë një kanal i vetëm politik ku janë grumbulluar shtresat më të vetëdijshme, më të guximshme dhe më të përkushtuara ndaj një vizioni opozitar të sinqertë, që për më shumë se dy dekada ka qëndruar përballë makinerisë së BDI-së dhe çmimit që kjo ka sjellë.
Sot, ky potencial shoqëror nuk ka më mundësi reale të krijojë një tjetër organizim politik opozitar të përmasave të Aleancës së bashkuar. Kjo për shkak të përçarjeve, dëshpërimit dhe fragmentimit që u shkaktua nga brenda – dhe në mënyrë të veçantë nga udhëheqja e z.Taravari.
Nëse ka mbetur një fije përgjegjësie politike e morale, Taravari duhet të jetë i pari që i prin procesit të ribashkimit opozitar, por jo më si udhëheqës, por si një aktor i heshtur në prapavijë. Sepse, drejtimi nuk mund t’i besohet më atij që vetë e shkatërroi unitetin.
Kuptohet, ky ribashkim duhet të bëhet edhe pa pjesë të “strukturave” përçarëse – individë që nuk kanë gjetur kurrë veten në asnjë drejtim politik, e që sot nuk dinë nëse janë me VLEN, me VV apo me ASH. Siç iu dha partia në tavolinë, në të njëjtën mënyrë duhet ta kthejë aty ku e mori – për t’iu shmangur stigmës historike të njeriut që shkatërroi opozitën dhe hapi derën e asimilimit politik të shqiptarëve përmes krijimit të “partiçkave” të mahallave dhe interesave personale.