Pas një sërë skandalesh që lidhen me kontratat mbi vepër, shitjen e tokave komunale dhe të parkingjeve, qytetarët e Tetovës nuk e mbështesin edhe një mandat të dytë Bilall Kasamin për kryetar komune.
Sipas burimeve të portalit TS, të cilat janë bazuar në matjet e opinionit publik nga disa kompani vendore dhe ndërkombëtare që pritet të publikohen ditëve në vijim, është vërejtur një rënie e ndjeshme e besueshmërisë ndaj kryetarëve në të gjitha komunat e Maqedonisë së Veriut. Megjithatë, rënia më e madhe është regjistruar në komunën e Tetovës, ku Bilall Kasami përballet me pakënaqësi të thellë për shkak të mosrealizimit të premtimeve të dhëna.
Disa nga premtimet e parealizuara të Bilall Kasamit përfshijnë:
– Premtimi për ndërtimin e qendrës së Tetovës, e cila u prezantua me video 7D, por nuk ka filluar asnjë punim konkret.
– Premtimi për ndërtimin e parkingjeve nëntokësore dhe mbi tokësore, ndërkohë që qyteti përballet me kaos dhe parkim të mjeteve në trotuare.
– Premtimi për parking falas, ndërkohë që çmimi i parkimit është rritur.
– Premtimi për një Tetovë pa mbeturina, ndërkohë që tarifa për mbeturinat është rritur ndjeshëm.
– Premtimi për furnizim me ujë 24 orë në ditë, ndërkohë që ka ndërprerje të shpeshta dhe rritje të çmimit.
– Premtimi për ndërtimin e stadiumit të qytetit, i cili u rrënua dhe mbeti në gjysmë.
– Premtimi për transparencë në qeverisje, por u punësuan mbi 500 militantë të Lëvizjes BESA në komunë.
Sipas të dhënave nga anketat, mbi 50% e qytetarëve të Tetovës nuk dëshirojnë që Kasami të marrë një mandat të dytë, për shkak të zhgënjimit të madh nga premtimet e pambajtura dhe rritjes së kostos së shërbimeve komunale.
Zgjedhjet lokale pritet të mbahen në tetor të këtij viti. Sipas analistëve, gara do të jetë më e lehtë për kundërkandidatët, të cilët do të përballen me një kryetar të dobësuar në opinionin publik.