Ushtria amerikane së shpejti mund të ketë në dispozicion një ushtri të tërë bombarduesish vetëvrasës indiferentë dhe pa ndjenja. Konkretisht, kompania amerikane e mbrojtjes AeroVironment ka prezantuar dronin me emrin “Red Dragon” (Dragoi i Kuq).
Ky është i pari në një linjë të re dronësh vetëvrasës. Është i pajisur me inteligjencë artificiale dhe mund të arrijë shpejtësi deri në 160 km/h, me një rreze veprimi prej gati 400 kilometrash. Vendoset dhe lëshohet brenda vetëm 10 minutash dhe peshon 20 kg.
Pasi të vendoset trekëmbëshi i vogël nga i cili ngrihet “Dragoi i Kuq”, ushtarët do të mund të lëshojnë deri në pesë dronë pa pilot në një minutë. Një video tregon se, sapo ky dron të përzgjedhë objektivin, kalon në fazën e sulmit duke u lëshuar mbi shënjestër si një raketë, shkruan Daily Mail.
Edhe pse dëmi nga ngarkesa shpërthyese do të ndryshojë në varësi të llojit të objektivit të goditur, AeroVironment thekson se “Dragoi i Kuq” mund të sulmojë çdo lloj shënjestre – nga tanke, automjete ushtarake e deri te kampet armike dhe ndërtesa të vogla. Droni mban deri në 10 kg eksploziv dhe mund të godasë objektiva në tokë, ajër apo det.
Ky dron del në skenë në një kohë kur dronët po ndryshojnë sistemet e luftës dhe po bëhen gjithnjë e më të zakonshëm në fushëbetejë, duke lëshuar bomba të komanduar nga distanca në objektiva në mbarë botën. AeroVironment ka njoftuar se kjo armë autonome është gati për prodhim masiv.
Ndryshe nga dronët e tjerë ushtarakë amerikanë, të cilët mund të mbajnë raketa, “Dragoi i Kuq” është vetë një raketë. Si shumë i lehtë, është projektuar për vendosje të shpejtë dhe fleksibilitet në fushëbetejë, duke u mundësuar njësive më të vogla ushtarake ta përdorin pothuajse kudo.
Pasi të ngrihet në ajër, konfigurimi softuerik AVACORE funksionon si truri i tij, duke menaxhuar të gjitha sistemet dhe duke i mundësuar përshtatje të shpejtë me kushtet në fushën e betejës. Sistemi i perceptimit SPOTR-Edge vepron si sytë, duke përdorur inteligjencën artificiale për të identifikuar dhe përzgjedhur objektivat në mënyrë të pavarur.