Një zbulim befasues ka ndodhur në Republikës Çeke, ku dy alpinistë, gjatë një shëtitjeje në pyjet e maleve Krkonose, kanë gjetur rastësisht një sasi të konsiderueshme ari dhe sendesh të çmuara të fshehura në një mur guri.
Thesari i gjetur përbëhej nga 10 byzylykë ari, 17 kuti purosh (dy prej të cilave ende të mbyllura), një kuti pudre, një krehër dhe 598 monedha ari.
Pas gjetjes, alpinistët e dorëzuan menjëherë thesarin në Muzeun e Bohemisë Lindore në Hradec Kralove. Sipas kreut të departamentit arkeologjik të muzeut, Miroslav Novak, thesari ka gjasa t’i përkasë periudhës përpara ose menjëherë pas Luftës së Dytë Botërore, kur banorët çekë dhe hebrenj po largoheshin nga zonat kufitare, ose kur gjermanët po iknin nga vendi në vitin 1945.
“Ka shumë të ngjarë që kjo të lidhet me periudhën e trazuar para fillimit të Luftës së Dytë Botërore, kur popullsia çeke dhe hebraike po largohej nga zona kufitare, ose me vitin 1945, kur gjermanët po largoheshin”, tha Novak.
Vlera vetëm e monedhave të arit, që peshojnë 3.7 kilogramë, vlerësohet rreth 360,000 dollarë, sipas ekspertit të monedhave të muzeut, Vojtěch Brádle. Hetimet për origjinën e thesarit vazhdojnë, ndërsa dy nga kutitë mbeten të pahapura, duke shtuar më shumë mister për atë që mund të zbulohet më tej.