Mbi 130 motra medicinale dhe staf teknik në Spitalin Klinik të Tetovës vazhdojnë të jenë pa vendime pune, pavarësisht se institucioni ka pasur dritë jeshile për punësime të përhershme që nga korriku i vitit të kaluar. Situata po cilësohet nga të punësuarit si shkelje serioze dhe neglizhencë institucionale, për të cilën askush nuk po mban përgjegjësi.
Ministrja e Financave, Gordana Dimitrieska Koçoska, konfirmoi publikisht se Spitali i Tetovës ka marrë pëlqim për punësimin e mbi 135 personave në afat të pacaktuar, por shprehu habi pse deri më tani këto punësime nuk janë realizuar.
“Spitali i Tetovës që në korrik ka marrë pajtim për punësimin e më shumë se 135 personave në afat të pacaktuar. Pse nuk janë realizuar këto punësime duhet t’i pyesni drejtuesit e spitalit. Unë nuk mund të jap përgjigje për këtë”, deklaroi Koçoska.
Ndërkohë, drejtori i Spitalit Klinik të Tetovës, Erzen Elezi, edhe në konferencën e fundit për media në dhjetor nuk dha sqarime konkrete, por u mjaftua me premtime se procesi është drejt përfundimit.
“Jemi në fazën përfundimtare, po kontrollohen testet dhe komisioni po bën punën e vet. Besoj se shumë shpejt do të përfundojë procesi për rreth 155 persona”, tha Elezi.
Por këto deklarata nuk i kanë qetësuar punonjësit. Në protestën e fundit, infermierët dhe stafi teknik ngritën akuza të rënda, duke deklaruar se në vend të tyre janë punësuar persona nga jashtë, pa asnjë ditë përvojë pune, me lidhje partiake.
Punonjësit kërkojnë vendime pune, transparencë dhe fund të punësimeve klienteliste, duke paralajmëruar se do të vazhdojnë reagimet nëse institucionet vazhdojnë të heshtin.