Koraima Torres, aktorja venezuelase e njohur për rolin e Kasandrës nga seriali me të njëjtin emër i viteve ’90, ka reaguar për herë të dytë lidhur me situatën në vendin e saj të lindjes pas operacionit ushtarak amerikan dhe arrestimit të presidentit Nikolas Maduro, përcjell TV21. Aktorja fillimisht reagoi me një fjali të vetme, duke u lutur për vendin e saj.
“Askush nuk fle, Venezuelë”, shkroi Torres.
Më pas, aktorja publikoi një fotografi të njërit prej adhuruesve të saj në profilin e saj në Instagram, në formë “story”.
Në fotografi dominon një bluzë me ngjyrat e flamurit venezuelas, ndërsa mbi të janë shkruar dy fjalë – “Venezuela libre”, që e përkthyer në shqip do të thotë “Venezuelë e lirë”.
Siç dihet, administrata e presidentit amerikan Donald Trump zhvilloi një operacion ushtarak në kryeqytetin e Venezuelës, Karakas, i cili ishte i përqendruar në disa pjesë të qytetit. Gjithashtu, presidenti i atij vendi, Nikolas Maduro, dhe bashkëshortja e tij u arrestuan dhe u dërguan në Nju Jork për gjykim.
Sipas të dhënave të disponueshme, aksioni ka zgjatur më pak se 30 minuta, pas së çka Maduro është transferuar në bazën ajrore Stewart në shtetin e Nju Jorkut.
Situata në mbarë Venezuelën është e tensionuar pas arrestimit të Maduros. Koraima Torres është një aktore venezuelase që e ka nisur karrierën e saj në fund të viteve ’80. Rolet e saj të para kanë qenë në telenovelat “Gardenia” dhe “Alondra”. Me rolin e Kasandrës në telenovelën me të njëjtin emër, ajo u bë e njohur jashtë vendit, si dhe në Maqedoni.