Irani ka njoftuar se është i gatshëm të shesë sisteme të avancuara armatimi në këmbim të kriptomonedhave.
Oferta vjen nga Qendra e Eksportit e Ministrisë së Mbrojtjes (Mindex) e drejtuar nga shteti dhe shënon një rast të rrallë të një vendi që pranon hapur kriptovalutat për eksportet strategjike ushtarake.
Sipas raportimeve, vendimi vjen në një moment kur ekonomia iraniane po përballet me inflacion të lartë dhe zhvlerësim të fortë të rialit, i cili në vitin 2025 arriti nivelin më të ulët historik kundrejt dollarit amerikan.
Të dhënat financiare tregojnë se inflacioni ka shkuar në rreth 42.5%, duke ushtruar presion të madh mbi jetesën e qytetarëve.
Kriza ekonomike ka nxitur gjithashtu protesta publike në disa qytete, ndërsa mediat shtetërore raportojnë thirrje për reforma dhe përgjegjësi më të madhe nga autoritetet.
Së fundmi, edhe guvernatori i bankës qendrore iraniane dha dorëheqjen, mes përpjekjeve të pasuksesshme për të stabilizuar monedhën.
Analistët theksojnë se përdorimi i kriptomonedhave për transaksione me vlerë të lartë është i ndjeshëm, sidomos në një kohë kur shumë shtete po forcojnë rregullat kundër pastrimit të parave (AML) dhe raportimin fiskal.
Megjithatë, Teherani e sheh këtë mekanizëm si një mënyrë për të anashkaluar sanksionet perëndimore, të cilat kanë goditur rëndë ekonominë dhe tregtinë e vendit.