Gazetari Naser Pajaziti ka reaguar ashpër ndaj zhvillimeve të fundit brenda koalicionit VLEN, duke ngritur shqetësime serioze për, siç i quan ai, riciklimin e figurave të vjetra politike dhe përjashtimin e profesionistëve të vërtetë nga proceset vendimmarrëse informon Tetovasot.
Sipas Pajazitit, figura që më parë kanë qenë pjesë e BDI-së dhe LSDM-së, sot i gjejmë të sistemuara brenda VLEN-it, pa asnjë reflektim apo përgjegjësi morale për të kaluarën e tyre politike. Ai thekson se këta individë nuk kanë ndjeshmëri shoqërore dhe, pavarësisht kësaj, paraqiten si predikues morali.
“Janë një shumicë dërmuese që pa pikë turpi vardisen rreth dyerve të pushtetit, duke grabitur çdo mundësi dhe duke ndarë poste e punësime sipas tekeve dhe pazareve të natës”, shprehet Pajaziti në reagimin e tij.
Banner 1Banner 2
Në anën tjetër, ai vë në pah se profesionistët e mirëfilltë dhe njerëzit e suksesshëm, të cilët prej më shumë se një dekade kanë kërkuar ndryshim dhe frymë të re, sot janë lënë në harresë. Sipas tij, ata janë pa status pune, pa respekt institucional dhe pa vendin që meritojnë në shoqëri, ndërsa për poste apo përgjegjësi publike as që bëhet fjalë.
Gazetari Pajaziti kritikon ashpër atë që e quan fenomen i “hardhucave sezonalë”, individë që sipas pushtetit vijnë e shkojnë, duke përfituar personalisht dhe pa dhënë asnjë kontribut real për vendin.
“Populli e di mirë se ndryshimi i vërtetë nuk vjen nga riciklimi i profiterëve, por nga ata që punojnë për vendin, jo për xhepin e tyre”, përfundon ai.
Reagimi i Pajazitit pritet të nxisë debat të mëtejshëm brenda opinionit publik për funksionimin, parimet dhe premtimet e koalicionit VLEN.
Postimi i plote:
Hardhucat dhe profiterët sezonal!
Nga BDI e LSDM sot i shohim në VLEN. Nuk i bëhet aspak vonë, s’kanë kokërr njerzillëku dhe fytyre, bile të shesin moral. Janë një shumicë dërmuese që pa pikë turpi vardisen rreth e rrotull dyerve të pushtetit, duke grabitur çdo mundësi dhe duke ndarë poste e punësime sipas tekeve dhe pazareve të natës.
Ndërkohë, profesionistët e vërtetë dhe njerëz të suksesshëm, që prej më shumë se një dekade kanë kërkuar frymë të re dhe ndryshim, sot janë harruar. Pa status pune, pa respekt, pa vendin që meritojnë. Për poste apo përgjegjësi publike? As që bëhet fjalë.
Ndërsa hardhucat sezonal vazhdojnë të vijnë e shkojnë sipas pushtetit, populli e di mirë: ndryshimi i vërtetë nuk vjen nga riciklimi i profiterëve, por nga ata që punojnë për vendin, jo për xhepin e tyre.