Ish-ministri i Mbrojtjes, Armend Mehaj, përmes një shkrimi në Facebook, bën thirrje që të mos përdoren etiketimet si ‘argat i Serbisë’, ‘tradhtar’, etj.
“I njoh të gjithë liderët e partive shqiptare askush prej jush nuk është kundër Republikës, kundër kombit tonë apo kundër interesit të Kosovës. Këto gjuhë nuk na forcojnë, vetëm na dobësojnë”, shkruan Mehaj.
Shkrimi i plotë:
Të nderuar udhëheqës politik të Kosovës,
Para nesh po vijnë zgjedhjet e përgjithshme parlamentare dhe zgjedhja e Presidentit dy procese kyçe që do të përcaktojnë drejtimin e shtetit për vitet e ardhshme. Ky është një moment i ndjeshëm për Kosovën, për demokracinë tonë dhe për rrugën tonë drejt NATO-s dhe Bashkimit Europian. Pikërisht tani, vendi ka nevojë për qetësi, maturi dhe bashkëpunim, jo për përçarje e fjalë të pavërteta.
Kosovës nuk i shërbejnë etiketimet e ulëta si “argat i Serbisë”, “tradhtar”, “në interes të Rusisë”, “hajn e jo luftëtar”, “jo atdhetar apo shkatrus”. I njoh të gjithë liderët e partive shqiptare askush prej jush nuk është kundër Republikës, kundër kombit tonë apo kundër interesit të Kosovës. Këto gjuhë nuk na forcojnë, vetëm na dobësojnë.
Inati personal, luftërat e kota politike dhe përplasjet e panevojshme nuk mund të vendosen mbi interesin e shtetit. Inati nuk mund të jetë më i madh se vlera e Kosovës, e popullit tonë dhe e së ardhmes së vendit. Sa herë humbim kohë duke u grindur mes vete, vetëm ata që se duan Kosovën të fortë përfitojnë.
Thirrja ime e sinqertë për të gjithë ju është kjo:
Pavarësisht dallimeve politike, bashkëpunoni për ligjet, marrëveshjet, buxhetin dhe proceset e shtetit. Kosova nuk e përballon më barrën e përçarjes, humbjes së kohës, shpenzimeve të kota e bllokadave të panevojshme sidomos tani, kur kemi hyrë në një fazë vendimtare drejt integrimit euro-atlantik.
Ju ftoj të garoni me programe të realizueshme, të dobishme dhe të ndershme. Programe që e ngrisin Kosovën, jo që e dëmtojnë kundërshtarin politik. Qytetarët meritojnë ide të mira, punë konkrete dhe vizion për katër vitet e ardhshme, jo akuza boshe.
Kjo është koha që secili prej nesh ta vendosë Kosovën para vetvetes, para partisë dhe para çdo interesi personal. Vetëm kështu ndërtojmë zgjedhje të qeta, të drejta e të besueshme dhe një shtet që u shërben qytetarëve të vet, jo interesave të ngushta.
E ardhmja jonë varet nga bashkëpunimi ynë sot dhe neser.
Kosova meriton më shumë. Kosova meriton unitet. Katër vitet e ardhshme do të kërkojnë bashkëvendimmarrje, bashkpunim, sepse përndryshe rrezikojmë të mbesim gjithmonë në prag të NATO-s dhe BE-së por jo brenda shtëpisë së tyre. Ne duhet të jemi aty, ulur në tavolinë si partnerë të barabartë, duke marrë vendime bashkë.
Mbajeni parasysh këtë thirrje. Nuk është thirrje politike, është thirrje për Kosovën, për stabilitetin, për interesin tonë kombëtar dhe për të ardhmen e fëmijëve tanë.
Kosova ka nevojë për unitet se NATO dhe BEja na pret.