Kryetari i Aleancës për Shqiptarët, Ziadin Sela, ka deklaruar publikisht mbështetjen e tij dhe të partisë për protestën që do të mbahet më 13 dhjetor në Shkup, e cila organizohet nga OVL-UÇK dhe figura të tjera politike shqiptare, përfshirë Ali Ahmetin.
Në deklaratën e tij, Sela thekson se protesta synon të kërkojë “drejtësi për krerët e UÇK-së që po gjykohen në Gjykatën Speciale në Hagë”, duke e cilësuar pjesëmarrjen si “detyrim moral” për të gjithë qytetarët shqiptarë.
Ai u bën thirrje anëtarëve të Aleancës për Shqiptarët, simpatizantëve dhe gjithë shqiptarëve pa dallim që të jenë të pranishëm në Sheshin “Skënderbeu” për të shprehur, siç thotë, “qëndrim të përbashkët ndaj një çështjeje me rëndësi kombëtare”.
Sipas Selës, çdo akuzë ndaj ish-drejtuesve të UÇK-së përbën “përpjekje për të njollosur një pjesë të rëndësishme të historisë së luftës për liri”.
Protesta e 13 dhjetorit pritet të tubojë një numër të madh qytetarësh nga Shkupi dhe rajoni.