Komuna e Çairit ka shpallur ditë zie për ditën e hënë, më 1 dhjetor 2025, pas ndarjes nga jeta të këngëtarit të njohur shqiptar, Shpat Kasapi. Vendimi u miratua sot në mbledhjen e 4-të të jashtëzakonshme të Këshillit të Komunës së Çairit, duke reflektuar pikëllimin e thellë të komunitetit për humbjen e artistit që la gjurmë të rëndësishme në muzikën shqiptare.
“Sot u miratua vendimi për shpalljen e ditës së zisë më 1 dhjetor 2025 në territorin e komunës sonë. Ky vendim pasqyron pikëllimin e komunitetit tonë për vdekjen e këngëtarit Shpat Kasapi”, thuhet në njoftimin e Komunës së Çairit.
Edhe Komuna e Tetovës, në nderim të figurës së Kasapit dhe ndikimit të tij në kulturën muzikore shqiptare, ka shpallur ditë zie, duke u bashkuar me qytetarët që po i japin lamtumirën e fundit këngëtarit.
Ndërkohë, të martën, më 2 dhjetor 2025, në ora 13:00, në Teatrin Shqiptar në Shkup do të organizohet një mbledhje komemorative. Në këtë ceremoni pritet të marrin pjesë familjarë, miq, qytetarë dhe artdashës të shumtë.
Libri i ngushëllimeve do të jetë i hapur nga e marta deri të premten në ambientet e Teatrit Shqiptar, në mënyrë që të gjithë qytetarët të kenë mundësinë të lënë një mesazh ngushëllimi për artistin.
Vendimi për ditën e zisë hyn në fuqi me publikimin në Fletën Zyrtare të komunave përkatëse.