Aleanca për Shqiptarët e udhëhequr nga Ziadin Sela ka vendosur të veprojë në mënyrë tërësisht autonome, pas një mbledhjeje të Kryesisë ku u analizua situata politike, rezultati i zgjedhjeve lokale dhe drejtimi i ardhshëm i subjektit. Sipas njoftimit, vendimi është marrë unanimisht, ndërsa ditëve në vijim deputetët e ASH pritet të procedojnë në Kuvend formimin e një grupi të pavarur parlamentar, raporton TV21.
ASH e Selës thekson se mbetet forcë opozitare dhe se do të vazhdojë komunikimin me subjektet e tjera opozitare shqiptare. Partia ka identifikuar tre shtylla kryesore të veprimit politik: kauzën kombëtare, barazinë e shqiptarëve në shtet dhe Kushtetutë, si dhe adresimin e dëmeve që – sipas tyre – ka shkaktuar Qeveria aktuale.
Në njoftim paralajmërohen takime të shpeshta me qytetarë, struktura partiake dhe aktorë politik e qytetarë, me synim forcimin e radhëve dhe mobilizimin në një periudhë që ASH e konsideron kritike për shqiptarët në Maqedoninë e Veriut. “Beteja jonë politike do të zhvillohet me gjithësecilin që kërkon ndryshim dhe përfaqësim dinjitoz”, thuhet ndër të tjera në kumtesë.