Aleanca për Ardhmërinë e Kosovës (AAK) ka arritur të formojë Grupin e saj Parlamentar në Kuvendin e Kosovës, falë bashkëpunimit me deputeten Duda Balje, përfaqësuese e komunitetit boshnjak dhe kryetare e Partisë Sociale Demokratike Unike (SDU).
Balje ka konfirmuar pjesëmarrjen e saj në këtë grup gjatë një prononcimi në Debat Plus, duke sqaruar se vendimi i saj ishte i bazuar në nevojat procedurale të Kuvendit.
“Nuk është lajmi i ri. E kam nënshkruar një ditë ose dy ditë pas konstituimit të Kuvendit. Kam qenë deputet i pavarur. Haradinaj me ekipin e vet, ka pas veç 5 deputetë, dhe kam shkuar t’i ndihmoj. Dhe pa 6 deputetë nuk mund të bëhet. E respektoj shumë zotin Haradinaj dhe krejt deputetët tjerë”, ka thënë Balje.
Megjithatë, deputetja ka theksuar se pjesëmarrja në grup nuk do të ndikojë në pavarësinë e saj politike dhe se ajo nuk do të votojë automatikisht sipas linjës së AAK-së, veçanërisht për çështje që lidhen për një qeveri nga Lëvizja Vetëvendosje.
“Edhe pse jam pjesë e grupit, unë do të qëndroj deri në fund. Nuk do të ndryshoj qëndrimin tim”, ka shtuar Balje.