Kryeministri i Kosovës, Albin Kurti, ka uruar koalicionin shqiptar VLEN për fitoren në zgjedhjet lokale në Maqedoninë e Veriut, ku ka arritur të marrë drejtimin në dhjetë komuna, nga Çairi deri në Tetovë.
Në një reagim publik, Kurti vlerësoi se dy kandidatët e këtij koalicioni, Izeti dhe Bilalli, kanë triumfuar me meritë falë projekteve konkrete dhe punës së ndershme, njëri që në raundin e parë, tjetri pas balotazhit, por të dy me diferencë të thellë.
Sipas Kurtit, ky rezultat është konfirmim i qeverisjes së mirë të VLEN-it dhe i vullnetit për ndryshim te shqiptarët, duke e cilësuar si një “shans të madh për reforma në Maqedoninë e Veriut”.
Ai theksoi se në 15 muajt e parë të qeverisjes, VLEN-i ka demonstruar “duar të pastra, pa korrupsion e skandale”, duke krijuar një dallim të qartë etik me qeverisjet e mëparshme.
Kurti shtoi se kjo frymë e ndryshimit ka sjellë bashkëpunim të hapur dhe shumëdimensional mes Kosovës dhe Maqedonisë së Veriut, nga takimet ndërqeveritare e deri te menaxhimi i përbashkët i kufirit.
“Kosova mirëpret zhvillimet demokratike në Maqedoninë e Veriut, si një dëshmi e perspektivës evropiane të partnerit dhe aleatit tonë,” përfundoi Kurti.