Dy burra dhe dy gra kanë mashtruar, më pas kanë rrahur një banor të Shkupit dhe i kanë marrë 200.000 denarë (rreth 3.200 euro). Njëra nga gratë është ende në arrati, njoftoi Prokuroria.
Më 30 tetor, viktima kishte shkuar me njërën nga të dyshuarat në një motel në Shkup, ku ajo i kishte propozuar të ftonte edhe një vajzë tjetër. Viktima ishte pajtuar dhe e dyshuara e kishte thirrur gruan tjetër, pas çka të dyja e kishin bindur të shkonin në një hotel tjetër, më të bukur dhe më të lirë.
“Ndërsa po dilnin nga dhoma, në oborrin e errët të motelit i kishin pritur dy burra, të cilët ishin në marrëveshje me gratë dhe së bashku iu vërsulën viktimës. E goditën me grushta në kokë dhe trup derisa ai ra në tokë, ndërsa nga xhepat ia morën paratë, telefonin dhe kartën e identitetit”, thuhet në njoftimin e Prokurorisë.
Për rastin, Prokuroria po zhvillon hetime për veprën penale “Grabitje” sipas nenit 237 paragrafi 4 lidhur me paragrafin 1 të Kodit Penal. Prokurori publik ka paraqitur kërkesë në Gjykatën Themelore Penale të Shkupit për caktimin e masës së paraburgimit për të katër të dyshuarit, për shkak të rrezikut të arratisjes dhe mundësisë së përsëritjes së veprës. Për njërën nga gratë, e cila është në arrati pas kryerjes së veprës, masa e paraburgimit do të zbatohet sapo të lokalizohet dhe arrestohet.