Gjatë një interviste televizive, aktori dhe sipërmarrësi Ermal Mamaqi ka bërë një deklaratë që ka ngjallur debat në rrjete sociale. Ai është shprehur se çdo person që pas moshës 40-vjeçare vazhdon të jetë i varfër, “e meriton të jetë i tillë”.
Duke folur për karrierën, biznesin dhe konceptin e suksesit, Mamaqi theksoi se çdo rezultat në jetë është pasojë e zgjedhjeve dhe kufijve personalë.
“Unë besoj se nuk ka rëndësi nëse je 40 apo 60 vjeç. Ke gjithmonë kohë të ndryshosh, por nëse je aty ku je, unë mendoj se e meriton. Ne meritojmë shokët që kemi, qeverinë që kemi, punën që kemi. Marrim atë që tolerojmë,” – u shpreh Mamaqi.
Ai shtoi se çdo gjë që ndodh në jetë, është pasojë e asaj që njeriu pranon dhe toleron:
“Nëse toleron një shef që të trajton keq, një partner që s’të respekton, apo veten tënde kur ha tortë, ajo që merr është pasojë e asaj që ke toleruar. Çdo gjë është rezultat i tolerancës sonë,” – tha ai.
Deklarata e Mamaqit ka shkaktuar reagime të ndryshme në publik, ku një pjesë e kritikëve e quajnë qëndrim arrogant dhe të shkëputur nga realiteti, ndërsa të tjerë e mbrojnë si një mesazh motivues për marrjen e përgjegjësisë personale.