Presidentja e Republikës së Kosovës, Vjosa Osmani, ka bërë të ditur sot nga Riadi se Siria ka njohur zyrtarisht pavarësinë e Kosovës.
“Sot në Riad arritëm marrëveshjen nëpërmjet së cilës Republika Arabe e Sirisë njeh Republikën e Kosovës, me mbështetjen e Lartësisë së tij Mbretërore, Princit të Kurorës së Arabisë Saudite, Muhammed bin Salman Al Saud,” ka deklaruar Osmani.
Ajo ka falënderuar Presidentin sirian Al Sharaa për vendimin, duke theksuar se njohja e ndërsjellë është një akt historik që simbolizon sakrificën dhe lirinë e dy popujve.
“Populli i Kosovës dhe ai i Sirisë kanë vuajtur e sakrifikuar shumë për lirinë. Kjo njohje nuk është vetëm e sovranitetit shtetëror, por edhe e sakrificës së brezave për të jetuar të lirë,” ka shtuar Presidentja Osmani.
Falënderime të veçanta ajo i ka drejtuar edhe Princit të Kurorës së Arabisë Saudite për rolin ndërmjetësues në këtë proces.
Me këtë zhvillim, numri i shteteve që e njohin pavarësinë e Kosovës arrin në 120.
“Republika jonë po ecë përpara dhe nuk ka asgjë që mund ta ndalë,” ka përfunduar Osmani.
🇽🇰🇸🇾🇸🇦