Kryetarja e Qytetit të Shkupit, Danella Arsovska, ka reaguar ashpër ndaj koalicionit VLEN dhe partisë VMRO-DPMNE, të cilët tashmë katër vite kanë shumicën në Këshillin e Qytetit dhe menaxhojnë me të gjitha ndërmarrjet publike në kryeqytet.
Përmes një postimi publik, Arsovska i akuzon ata për sabotim të qëllimshëm të punës së institucioneve, duke krijuar kaos në qytet, që më pas të mund të paraqiten si “shpëtimtarë” përmes aksioneve të pastrimit 72-orëshe.
“Normalisht që do ta pastroni qytetin për 72 orë. E bëni nga inati, që kur të vini ju, të tregoheni shumë të suksesshëm dhe të aftë. E gjithë kjo, vetëm për të fshehur krimin dhe për të vazhduar me ndërtimet pa leje”, shkruan Arsovska.
Kryetarja i drejton akuza të rënda edhe kryetares së Bordit të Drejtorëve të NP “Komunalna Higiena” – Julijana Spirovska nga radhët e VMRO-së, për të cilën thotë se është e dënuar me vendim të formës së prerë për dy vepra penale dhe që, sipas saj, po e udhëheq ndërmarrjen tashmë 4 vite.
“Për mbeturinat në Shkup, le t’i drejtohen kryetares së Bordit të Drejtorëve në Komunale Higjienë, Julijana Spirovska nga VMRO, e dënuar për dy vepra penale”, shkruan Arsovska.
Ajo gjithashtu i akuzon për bllokimin e investimeve dhe pengimin e punës së ndërmarrjeve publike, duke përmendur se VLEN dhe VMRO:
Nuk kanë lejuar blerjen e mekanizmave të rinj për pastrim;
Nuk kanë lejuar punësime të pastruesve dhe operatorëve;
Kanë refuzuar të miratojnë propozime në Këshillin e Qytetit, pavarësisht shumicës që e kanë;
Kanë menaxhuar të gjitha ndërmarrjet publike dhe institucionet në Shkup gjatë katër viteve të fundit.
“VMRO/VLEN i menaxhojnë të gjitha – nga NP Higjiena Komunale, NP Transporti Publik (JSP), institucionet publike e deri te shkollat. Dhe tani duan t’i fajësojnë të tjerët për kaosin që vetë e kanë krijuar”, përfundon ajo.