Në prag të zgjedhjeve lokale të 19 tetorit, është vërejtur një mospërputhje në qëndrimet e Kryeministrit Hristijan Mickoski dhe zëvendëskryeministrit Izet Mexhiti lidhur me mundësinë e mbajtjes së zgjedhjeve të parakohshme parlamentare.
Mickoski nuk e përjashton këtë mundësi, duke e lidhur me rezultatin e zgjedhjeve lokale, ndërsa Mexhiti e kundërshton prerazi, duke deklaruar se “nuk do të ketë zgjedhje parlamentare”.
Kjo ndarje qëndrimesh ndodh në një moment kur sondazhet flasin për një epërsi të ndjeshme të koalicionit AKI ndaj VLEN, me raporte që shkojnë deri në 3 me 1. Për disa analistë, kjo mund të jetë arsyeja pse VLEN po e shmang diskutimin për zgjedhje, nga frika se rezultati i 19 tetorit mund të reflektojë një humbje edhe më të thellë në nivel parlamentar.
Ky kontrast deklaratash ngre pikëpyetje mbi koordinimin brenda qeverisë dhe lë të hapur skenarin për zhvillime të reja politike pas zgjedhjeve lokale.