Ndërtesa e Kuvendit të Izraelit, institucion i njohur edhe si Knesset, janë ndriçuar me ngjyrë të kuqe, të bardhë dhe të kaltër në nderim të një vizite të pritshme të presidentit amerikan, Donald Trump, pas njoftimit të marrëveshjes së armëpushimit në Gaza mes Izraelit dhe Hamasit.
Në fazën e parë të marrëveshjes është siguruar lirimi i të gjitha 48 pengjeve që po mbahen në enklavë, shkruan gazeta “The Times of Israel”.
Sipas televizionit publik izraelit, “Kan TV”, Trumpi pritet të arrijë në Izrael të dielën pasdite, në orën 15:00. Vetë presidenti amerikan nuk e ka konfirmuar këtë vizitë ende.
The Knesset building is lit in red-blue-white in honor of U.S. President Trump who is expected to deliver a speech in the Israeli parliament on Sunday. pic.twitter.com/0HvNuA8pLe
— i24NEWS English (@i24NEWS_EN) October 9, 2025
Një zëdhënës i Knesset-it tha se ndërtesa e këtij institucioni do të mbetet e ndriçuar me ngjyrat e flamurit amerikan deri në përfundimin e vizitës së presidentit Trump.
Kryeministri izraelit, Benjamin Netanyahu, thuhet se e ftoi Trumpin për t’iu drejtuar ligjvënësve izraelitë gjatë një telefonate të zhvilluar më herët të enjten.
Mbetet e paqartë nëse presidenti amerikan e ka pranuar ftesën për vizitë, edhe pse e ka shprehur gatishmërinë për të folur në sallën e këtij institucioni.