Kandidatja për Këshillin e Komunës së Butelit nga Aleanca për Komb dhe Integrim (AKI), Senka Nuhiu-Qafleshi, ka reaguar pas dëmtimit të reklamës zgjedhore të kandidatit për kryetar komune, prof. dr. Isamedin Azizi.
Në reagimin e saj, Nuhiu-Qafleshi thekson se gjatë tubimit të VMRO-DPMNE-së në Butel, është dëmtuar qëllimisht reklama e kandidatit të AKI-së, duke e cilësuar këtë si një akt vandal dhe provokim politik në prag të zgjedhjeve të 19 tetorit.
“E dënojmë me ashpërsinë më të madhe këtë veprim vandal dhe kërkojmë nga organet e rendit që të reagojnë menjëherë, duke identifikuar dhe ndëshkuar autorët dhe porositësit e këtij akti të ulët, pas të cilit qëndrojnë aktivistë të VMRO-DPMNE-së,” – thekson ajo.
Nuhiu-Qafaleshi shton se “mund të dëmtojnë fotografinë e profesor Isamedin Azizit, por nuk mund të dëmtojnë dinjitetin, krenarinë dhe përkushtimin e tij”, duke theksuar se asnjë akt vandal nuk do të ndalë përpjekjet për ndryshim në Butel.
Në fund, ajo bën thirrje për garë të ndershme, qetësi dhe respekt të procesit zgjedhor, në mënyrë që 19 tetori të jetë dita e fitores së demokracisë, jo e dhunës dhe frikësimit.
