Sonte në orën 12:00, në hapësirat e Televizionit të Maqedonisë (MRTV), ishte paraparë të zhvillohej debati televiziv mes kandidatit për kryetar të Çairit, Bujar Osmani, dhe kundërkandidatit të tij, Izet Mexhiti.
Sipas Osmanit, të dy kandidatët kishin pranuar ftesën zyrtare nga televizioni, ku ishte përcaktuar qartë se edhe në rast se njëri prej tyre nuk paraqitet, debati do të mbahet me “karrigen e zbrazët”.
“Erdha në kohë, ashtu siç u dakorduam. Madje lashë edhe takimet me qytetarët që të jem pjesë e debatit, sepse mendoj se qytetarët duhet të shohin ballafaqimin mes ofertave tona. Por kundërkandidati im, z. Izet Mexhiti, sërish nuk e mbajti fjalën dhe nuk u paraqit,” deklaroi Osmani para kamerave të MRTV-së.
Ai shtoi se edhe vetë televizioni publik duhet të qëndrojë pas premtimeve të veta, duke respektuar rregullën që në mungesë të njërit kandidat, debati të mbahet me karrigen e tij të zbrazët.
“Të gjithë kandidatët e tjerë pranuan të marrin pjesë, përveç Izet Mexhitit. Ju e vlerësoni vetë pse dikush i ik ballafaqimit publik,” theksoi Osmani.
Kandidati i AKI-s në Çair tha se do të vazhdojë takimet me qytetarët për të prezantuar programin dhe ofertën e tij për “ndryshimin e madh që po vjen në Çair më 6 tetor”.
“Unë nuk i iki ballafaqimit. Kam guxim të flas për të kaluarën, të tashmen dhe të ardhmen. Ata që fshihen pas kamerave, le t’i gjykojë populli,” përfundoi Osmani.