Kryeministri i Izraelit, Benjamin Netanyahu, ka paralajmëruar një rrezik të madh nga Irani, duke theksuar se ky i fundit mund të ketë armë bërthamore brenda një viti dhe ka theksuar se Teherani është i gatshëm t’i përdorë ato.
Gjatë një interviste të regjistruar për emisionin “Life, Liberty & Levin” të Fox News, Netanyahu foli për situatën e tensionuar në Lindjen e Mesme dhe për kërcënimin e drejtpërdrejtë nga Irani.
Netanyahu tha se, pas humbjes së Hezbollahut dhe rënies së boshtit të disa shteteve të tjera, Trupat e Gardës Revolucionare Islamike në Iran kanë përshpejtuar procesin e pasurimit të uraniumit dhe janë shumë pranë zhvillimit të një arme bërthamore.
“E pamë. Thamë se brenda një viti ata do të kenë një bombë bërthamore dhe do ta përdorin atë”, theksoi ai.
Kryeministri i Izraelit shprehu shqetësimin se, ndryshe nga fuqitë bërthamore të tjera, Irani ka deklaruar se do ta përdorë armën bërthamore për të shkatërruar Izraelin, duke e cilësuar këtë si një kërcënim ekzistencial për shtetin hebre.