Lideri i Aleancës për Shqiptarët, Ziadin Sela, ka zhvilluar një takim me anëtarët dhe simpatizantët e partisë në fshatin Gradec të Komunës së Vrapçishtit – një nga bastionet e kësaj force politike në rajonin e Pollogut.
Në një atmosferë të ngrohtë dhe mobilizuese, Sela theksoi se struktura e Aleancës për Shqiptarët jo vetëm që është e konsoliduar, por po rritet dhe forcohet dita-ditës. Ai vlerësoi mbështetjen e pandërprerë të qytetarëve dhe angazhimin e tyre aktiv në procesin politik.
“Struktura jonë mbetet jo vetëm e konsoliduar, por edhe po forcohet, dhe radhët tona po shtohen çdo ditë e më shumë. Aleanca për Shqiptarët është shpresë dhe shtëpi për çdo shqiptar,” deklaroi Sela gjatë takimit.
Takimi në Gradec u cilësua si dëshmi e mobilizimit të vazhdueshëm në terren dhe si sinjal i qartë se Aleanca për Shqiptarët po hyn në fazën e re të fuqizimit dhe përgatitjes për sfidat politike që e presin vendin.
Me moton #VazhdojmëPërpara, Sela u shpreh se angazhimi i partisë do të vazhdojë pa ndërprerje në çdo cep ku jetojnë shqiptarët, duke dëgjuar zërin e qytetarëve dhe duke ndërtuar një alternativë të fuqishme politike në shërbim të interesit kombëtar dhe qytetar.