Kryetarja e Shkupit, Danella Arsovska, ka reaguar ashpër ndaj institucioneve shtetërore, duke i akuzuar se në vend që të ndjekin penalisht ndërtimet e paligjshme të lidhura me zyrtarë të VLEN-it, po ushtrojnë presion dhe hakmarrje ndaj zyrtarëve të ndershëm.
Ajo përmendi konkretisht rastin e Visar Ganiut dhe Izet Mexhitit, të cilët sipas saj janë përgjegjës për mbi 150 ndërtime të paligjshme dhe për krim financiar me shuma milionëshe, por të paprekshëm nga drejtësia.
“Në vend që të arrestoni ata, ju hakmerret ndaj Ivana-s, e cila dje kishte guximin të tregojë publikisht rrezikun që u kanoset qytetarëve nga këto ndërtime,” tha Arsovska.
Ajo i akuzoi strukturat shtetërore se po shërbejnë si mburojë për Ganiun dhe Mexhitin dhe e përmbylli me një mesazh të ashpër:
“Ju nuk do të sillni drejtësi – vetëm do të vazhdoni të vidhni, ndërsa gratë e ndershme i ndëshkoni sepse nuk guxoni të prekni kriminelët që keni në qeveri.”