Në rrugët dhe hapësirat publike të Strugës, prania e lypësve është kthyer në një çështje që ka ngritur shqetësime të shumta mes qytetarëve. Ata kërkojnë reagim institucional dhe theksojnë ndikimin negativ në përditshmërinë e tyre.
“Janë shumë. Duhet të ndalen, se është bërë mërzi, ulen nëpër tavolina dhe ua largojnë njerëzit. Nuk është mirë! Personalisht më vjen keq për ta, ndoshta kanë nevojë, por shteti duhet të ndërhyjë dhe të ofrojë ndihmë që të mos jenë nëpër rrugë si tani.” – tha një qytetarë strugan.
Në shumë raste, qytetarët ndihen të penguar edhe në momentet më të thjeshta të ditës së tyre.
“Populli po mundohet t’i ndihmojë, por ata po e pengojnë popullin. Pushteti duhet të marrë masa. Policia, komuna – dikush të reagojë! Nuk mund të pimë as kafenë rehat.”
“Është bërë problem i përditshëm. Ulesh në ndonjë vend dhe të afrohen menjëherë. Disa janë të papastër, ndoshta edhe të sëmurë. Të shajnë nëse nuk u jep para. Pengojnë të rinjtë dhe të gjithë qytetarët. Duhet vullnet që kjo situatë të zgjidhet.”
“Janë gjithandej – nëpër rrugë, dyqane… Nuk ka qetësi!” – thanë disa nga qytetarët e Strugës të intervistuar nga TVM2.
Megjithatë, nuk mungojnë edhe ata që tregojnë mirëkuptim dhe thërrasin për mbështetje sociale.
“Mua personalisht nuk më pengojnë. Ndoshta kanë hall. Shteti duhet të japë më shumë ndihma sociale dhe t’i punësojë ata që janë të aftë për punë. Në vend që të rrinë në rrugë, le të gjendet një formë për t’i ndihmuar.” – u shpreh një qytetarë tjetër.
Fenomeni i lypjes, veçanërisht kur përfshin persona të sjellur nga jashtë zonës, po kthehet në sfidë për jetën publike në Strugë.
Qytetarët presin masa konkrete nga autoritetet për të kthyer qetësinë dhe rendin në qytet, duke ruajtur njëkohësisht dinjitetin dhe ndihmën për ata që janë vërtet në nevojë.