Burim Latifi, një nga figurat kryesore të Lëvizjes Demokratike të Izet Mexhitit ka reaguar në lidhje me takimet e kreut të ASH-së, Arben Taravari me përfaqësues të Bashkimit Demokratik për Integrim (BDI), duke i cilësuar ato si devijim të rrezikshëm nga ideali për ndryshim.
“Çdo takim me udhëheqësit e BDI-së paraqet më së paku shkelje flagrante të vullnetit popullor për ndryshim që rezultoi me 107 mijë vota të pastra shqiptare,” shkruan Latifi, duke kujtuar mobilizimin popullor që, sipas tij, e dërgoi BDI-në në opozitë pas 22 vitesh qeverisje, përcjell zyrtare.net
Ai thekson se motivimi për ndryshim lindi nga premtimi për një qeverisje me frymë të re, politikë të ndershme dhe një brez politikanësh që e mbajnë fjalën. Sipas Latifit, çdo marrëveshje për bashkëpunim me BDI-në është një “devijim i skajshëm” nga këto ideale.
Në fund, ai përkujton se pesë subjektet politike – Lëvizja Demokratike, Lëvizja Besa, Alternativa, Aleanca për Shqiptarët dhe Vetëvendosje – u bashkuan një vit më parë pikërisht për ta sjellë këtë ndryshim, ndaj çdo hap në drejtim të kundërt bie ndesh me vullnetin e qytetarëve./ZYRTARE.net/