Kryetari i Komunës së Zhelinës, Blerim Sejdiu nga VLEN ka reaguar ashpër ndaj deklaratave që përpiqen të zvogëlojnë rolin e kësaj force politike në Qeveri. Sipas tij VLEN ka ndikim të drejtpërdrejtë në vendimarrje dhe se nuk do të lejojë që individë të pakënaqur të dëmtojnë imazhin e saj për interesa personale.
“E para, VLEN është faktor kyç në Qeveri – VLEN është pjesë thelbësore e Qeverisë dhe përfaqësuesit tanë kanë ndikim të drejtpërdrejtë në vendimmarrje. Nuk ka vend për narrativa që përpiqen të zvogëlojnë rolin e VLEN-it. Këto përpjekje do i bëjmë të dështojnë!
E dyta, sa i përket “koordinimit” mes VLEN, nëse ka çështje që kërkojnë përmirësim në koordinim, ato duhet të trajtohen brenda VLEN-it, dhe jo nëpërmjet deklaratave publike që dëmtojnë pozitën e përbashkët. Nuk është momenti për të bërë lojëra politike individuale.
E treta, funksionarët që japin dorëheqje ose bëjnë deklarata të tilla si “e provuam por nuk ia dolëm”, atëherë është çështje e paaftësisë së tyre personale dhe jo e VLEN-it. VLEN nuk mund të mbajë përgjegjësi për dështimet e individëve.
E katërta, fundja roli i Taravarit është përgjegjësi e tij – nëse Taravari pretendon se VLEN nuk ka fuqi, atëherë pse funksionarët e tij pranuan poste? Kjo tregon një qëndrim kontradiktor që duhet të sqarohet nga ai dhe nga njerëzit e tij, jo nga VLEN.
E pesta, duhet mbajtur përgjegjësi politike –pra, funksionarët duhet të sillen me përgjegjësi dhe lojalitet ndaj misionit të VLEN-it. Nëse nuk janë të kënaqur, kanë të drejtën të largohen, por nuk kanë të drejtë të dëmtojnë strukturën që u dha mundësinë të kontribuojnë”, ka numëruar Sejdiu.