Federata Shqiptare e Futbollit (FSHF) ka njoftuar të mërkurën se janë shitur të gjitha biletat për ndeshjen Shqipëri – Çeki. Kjo ndeshje luhet më 16 nëntor në stadiumin “Air Albania” në Tiranë dhe i takon Grupi 1 të Ligës B të Ligës së Kombeve.
“Interesi për të ndjekur ndeshjen Shqipëri – Çeki ka qenë i lartë dhe Federata e Futbollit dëshiron të falënderojë të gjithë tifozët e Kombëtares që kanë vendosur të jenë të pranishëm në stadiumin ‘Air Albania’ më 16 nëntor, në mbështetje të ekipit tonë kombëtar dhe i fton të krijojnë një atmosferë të ngrohtë, pozitive dhe të tregojnë qytetari dhe respekt përmes një sjelljeje korrekte ndaj ekipit kundërshtar”, shkruan FSHF-ja të mërkurën.
Shqipëria luan në Tiranë edhe ndeshjen e fundit të edicionit të katërt të Ligës së Kombeve kundër Ukrainës. Ndeshja luhet më 19 nëntor.
Shqipëria është në vendin e tretë me gjashtë pikë sa ka edhe Gjeorgjia. Çekia është e para me shtatë pikë. Ukraina e fundit me katër pikë.
Vendi i parë siguron paraqitjen në Ligën A të Ligës së Kombeve në edicionin e ardhshëm, kurse vendi i dytë do të paraqitet në plejof.