Zëvendës-Ministri i Mbrojtjes, Tiron Jajaga sëbashku me zëvendës – shefin e Shtabit të Përgjithshëm të Armatës, Azim Nuredin kanë vizituar sot selinë e Brigadës së Evropës Juglindore (SEEBRIG), e cila do të jetë e vendosur në Kumanovë deri në vitin 2026. Gjatë vizitës, Jajaga u takua me komandantin e SEEBRIG, gjeneral brigade Bilbil Bitri.
Në takim, Jajaga theksoi se Ministria, do të vazhdojë të mbështesë Komandën e kësaj Brigade, e cila me aktivitetet dhe kontributin e saj në zhvillimin dhe ndërveprimin ndërmjet vendeve anëtare, përfaqëson një nga format më të suksesshme të bashkëpunimit rajonal.
Gjenerali, Bilbil Bitri falënderoi për mbështetjen në funksionimin e Komandës së Brigadës.
Brigada e Evropës Juglindore është themeluar në vitin 1999, bazuar në marrëveshjen për bashkëpunim rajonal në fushën e mbrojtjes, e njohur si Marrëveshja për Forcat Shumëkombëshe Paqeruajtëse të Evropës Juglindore (FSHPEJL), e nënshkruar në vitin 1998 në Shkup. Anëtarë të SEEBRIG-ut janë Maqedonia e Veriut, Shqipëria, Bullgaria, Greqia, Rumania dhe Turqia.