Sot janë bërë 8 vjet që kur ish-aktivisti i Lëvizjes Vetëvendosje, Astrit Dehari, ndërroi jetë në Qendrën e Paraburgimit në Prizren. Por, rasti i tij mbetet ende i pazgjidhur nga organet e rendit në Kosovë. Përkundër raporteve zyrtare që thanë se Dehari ka vrarë vetën, familja vazhdon të insistojë se i biri i tyre u vra. Se çka ndodhi në këto 8 vjet, e mësojmë nga storia në vazhdim.
Me 4 gusht të vitit 2016, një predhë u hodh në drejtim të Kuvendit të Kosovës.
E për këtë rast, nën pranga si të dyshuar, përfunduan 6 aktivistë të Lëvizjes Vetëvendosje.
Në mesin e tyre, ishte edhe tashmë i ndjerë Astrit Dehari.
Por, 5 nëntori i po atij viti, doli të jetë tragjik për aktivistin e ri.
Ky i fundit u gjet pa shenja jetë në Qendrën e Paraburgimit në Prizren.
Pas përfundimit të autopsisë, para medieve doli kryeprokurori i Prizrenit, Sylë Hoxha.
Ky dha lajmin se, Astrit Dehari, kishte kryer vetëvrasje.
Por këtë konstatim të organeve të shtetit, e kundërshtuan ashpër familja Dehari.
Në paraqitjet për media, prindërit e Astritit, deklaruan se i biri i tyre nuk kishte asnjë arsye për ta kryer këtë vepër.
Këta të fundit, kërkuan që një ekspertizë tjetër të kryhet në Lozanë të Zvicrës.
Nga Instituti i Mjekësisë Ligjore në Lozanë, thanë se gjasat që Dehari të këtë bërë vetëvrasje janë të vogla.
Ndërsa raporti pohoi se ekziston mundësia e përfshirjes së një personi të tretë.
E rasti Dehari, mori edhe një herë vëmendjen, plot 6 vjet pas vdekjes së tij.
Kjo pasi nga Instituti i Mjekësisë Ligjore, u zhdukën mostrat e Astrit Deharit.
E pak kohë me pas, u bë e ditur se janë gjetur mostrat e ish-aktivistit të Lëvizjes Vetëvendosje.
E ky rast, kishte kaluar nga Prokuroria Themelore në Prizren, në duart e Prokurorisë Speciale.
Këtë të fundit, këtë vit partia në pushtet, që dikur i takonte edhe vet Astrit Dehari, e akuzoi se po qëllimisht po e zvarrit këtë rast.
“Në këtë rast unë dua të deklaroj edhe në emër të Vetëvendosjes strategjia e prokurorisë shtetit të Kosovës është e qartë zvarritje e qëllimshme e rastit, bartje e rastit në kompetencë të prokurorëve parapensionistë që dorëzojnë stafetën e krimit njëri te tjetri”, ka thënë Sami Kurteshi.
Ndryshe, të martën janë bërë 8 vjet që kur ish-aktivisti i Vetëvendosjes, Astrit Dehari ndërroi jetë.