Ilire Dauti: “Shqiptarët po dëmtohen nga vendimet e qeverisë dhe bashkëpunimi i disa përfaqësuesve shqiptarë”

Deputetja Ilire Dauti ka akuzuar qeverinë dhe disa ministra shqiptarë për vendime që, sipas saj, kanë cenuar interesat e shqiptarëve në Maqedoninë e Veriut.

“Kur Mickoski e shkeli legjitimitetin e shqiptarëve, atë e bëri me ndihmën e disa shqiptarëve,” deklaroi Dauti. Ajo kujtoi se edhe shfuqizimi i Balansuesit u votua në Qeveri nga ministra shqiptarë.

Deputetja theksoi se si pasojë e vendimeve të fundit, diaspora është fshirë nga proceset zgjedhore, çka do të sjellë humbje përfaqësimi: “Struga do të ketë katër këshilltarë më pak,” tha ajo. Sipas Dautit, qyteti ka humbur rreth 1 miliard euro nga kredia hungareze dhe ndodhet në situatë të rëndë financiare.

Ajo përmendi edhe Ligjin për Branitellat, duke kritikuar faktin se ministrat shqiptarë sollën ligjin në Kuvend vetëm në gjuhën maqedonase: “Është e dhimbshme kur sheh se edhe ministrat shqiptarë sjellin ligjet në Kuvend vetëm në gjuhën maqedonase,” u shpreh Dauti.

Deputetja vuri në dukje se nuk mjafton zgjedhja e kryetarëve të komunave të aftë, nëse shqiptarët nuk kanë përfaqësues të fuqishëm në Qeveri: “Ne mund të zgjedhim njerëzit më brilantë si kryetarë komunash, por pa shqiptarë të fortë në Qeveri, ata do të përfundojnë vetëm me borxhe,” tha ajo.

Dauti apeloi që vota e shqiptarëve të mos shkojë thjesht për individë, por për të afirmuar të drejtën e vetëvendosjes: “Me votën tuaj nuk do ta bëni fitues vetëm Arsim Dalipin dhe Faton Pollozhanin, por do të tregoni se nuk është e mundur që për pragun tuaj të vendosin të tjerët. Ju jeni zot në shtëpinë tuaj,” përfundoi ajo.